DAVAO CITY – Gikatala ang 3.52% nga positivity rate sa covid 19 cases sa Southern Philippines Medical Center.
Kini human ang 19 ka mga bag-ong positive cases nga natala sa nahisgutang ospital gikan sa 540 nga kinatibuk-ang ihap sa mga indibiduwal nga gipa-ilalom sa test.
Samtang subay sa gipagawas nga pinaka-ulahing record sa SPMC, kagahapong adlawa Enero 4, 2022 wala kini gikatalang namatay, apan adunay usa ka bag-ong kaso, 12 ang active case, ug 2 ang recoveries.
Sulod sa pila na ka semana nagpabilin usab nga luag ang hospital beds sa SPMC diin 31 gikan sa 60 ang utilization sa ICU beds o 51.67% samtang, 82 gikan sa 308 usab ang utilization sa ward beds niini o 26.62%.
Samtang naglaom usab ang kadumalahan sa SPMC nga magpabiling ubos ang positivity rate sa syudad bisan pa man ug wala masunod sa katawhan ang minimum health protocols niadtong pasko ug bag-ong tuig partikular na ang pagsuot ug facemask ug physical distancing.
Hinuon, na-una nang gipasalig ni SPMC Chief Dr Ricardo Audan nga kanunay andam ang ilang ospital kung ugaling subling modagsa ang daghang mga pasyente sa COVID 19.
Gani niadto pang bulan sa desyembre sa nakalabay nga tuig naa na silay giandam nga mga plano alang niini.
