Gumikan sa padayon nga kabalaka sa mga otoridad kabahin sa bag-ong matang sa Covid-19 nga gikan sa United Kingdom, nagpadala na ang Southern Philippines Medical Center (SPMC) og specimen sample sa Covid-19 ngadto sa Philippine Genome Center sa kauluhon aron masuta kung aduna nay kaso sa new variant sa Covid-19 sa dakbayan sa dabaw.
Gitino sa SPMC OIC Dr. Ricardo Audan nga gipadala na ang 10 ka specimen ngadto sa kaulohan gumikan nga walay matud pa kapasidad ang main laboratory sa Mindanao nga masuta kung aduna nay bag-ong matang sa Covid-19 sa syudad.
Kalabot niini, gikumpirma ni Dr. Ashley Lopez nga kasamtangan ang Philippine Genome Center lamang ang adunay kapasidad nga maka tumbok sa UK variant.
Hinuon, gikaingon nga nagpahigayon na ang lokal nga kagamhanan og biosurvellance kabahin sa nasampit nga new variant.
Padayon nga nagpahimango ang mga otoridad sa publiko nga padayon nga mutamod sa mga health protocols ingon man mga mando sa gobyerno batok Covid-19 gumikan nga mas makatakod matud pa ang bag-ong variant sa makamatay nga kagaw.
