DAVAO CITY – Dungan sa gikatakda nga pag-abot sa mga bakuna dinhi sa dakbayan, gi-angkon karon sa pamunoan sa Southern Philippines Medical Center (SPMC) nga adunay pipila nila ka mga empleyado ang adunay pagduha-duha nga magpabakuna gumikan sa pipila ka mga rason.
Sumala pa kang SPMC officer-in-charge Dr. Ricardo Audan, nga anaa lamang sa 62 percent o anaa sa 3,200 gikan sa 5,000 SPMC workers nga gilangkuban sa mga medical ug non-medical frontliners ang milagda sa pre-vaccination registration.
Posible sab sumala pa nga mas moubos pa kini atol mismo sa vaccination day apan nagtuo ang opisyal nga ang nahisgutan nga empleyado ang andam nga mag-boluntaryo nga magpabakuna human nga mihatag na kini sa ilang consent atol sa registration nga gipahigayon online.
Apan una na sab nga gibutyag ni SPMC Vaccination Committee Chairperson Dr. Pamela Ferrer nga dili tanan nga naka-rehistro ang kwalipikado nga mabakunahan sa higayon nga sugdan na kini.
