DAVAO CITY- Kasamtangan nga nagtuon ang Committee on Transportation uban ang Committee on Peace and Public Safety kung unsaon mapaubsan pa ang speed limit sa syudad, partikularminte diha sa Diversion Road, CP Garcia Highway, lakip na gikan diha sa Panacan junction hangtod sa Ulas bypass road.
Kini mismo ang gikanayon ni konsehal Condrado Baluran, chairperson sa Committee on Transportation.
Gikanayon nga inay 60 kilometer per hour ang speed limit, buot nila nga himuon na lamang kining 40 kilometer per hour.
Ginatun-an sab sa komitiba ang pagpa-ubos sa speed limit sa downtown area nga sa kasamtangan anaa sa 30-40 kilometer per hour.
Tumong niini nga malikayan ang disgrasya sa kadalanan tungod sa paspas nga pagpadagan sa mga sakyanan. Kahinumduman nga niadtong nakalabay nga semana, usa ang namatay sa nahitabong panagbangga sa diversion road.
Kagahapon sa hapon sab, nabalintong ang usa ka tricycle human kini nabanggaan sa usa ka SUV.
