DAVAO CITY – Ablihan na sab ang karung adlaw ang special sites alang sa pediatric vaccination alang sa nagpadayon nga pagbakuna sa mga bata nga nag-edad ug 5 ngadto na sa 11 anyos.
Sumala pa kang Dr. Michelle Schlosser, tigpamaba sa Davao City Covid-19 Task Force, mamahimong ipahigayon na sab sugod karung adlawa ang pagbakuna sa nahisgutan nga age group sa Almendras Gym, San Roque Central Elementary School, ug Vicente Hizon Elementary School.
Una ng gibutyag ni Schlosser, nga kinahanglan magmugna ug kid-friendly atmosphere aron lamang malikayan ang medication errors ilabi na nga anaa lamang sa 0.2ml dose vaccines ang gitugot sa mga bata.
Gikanayon sab sa opisyal nga laoman ang dugang pa nga mga bakuna nga muabot sa dakbayan nga igahin alang sa mga special sites.
Kahinumduman nga una ng gipahigayon ang pilot run sa pediatric vaccination sa Southern Philippines Medical Center (SPMC) ug sa Davao Medical School Foundation (DMSF) apan kaniadtong milabay Pebrero 18, midawat na ang Davao Doctors Hospital ug pediatric vaccinees.
Subli sab nga gipahinumdoman ang mga ginikanan nga magdala ug gikinahanglan nga mga rekisitos alang sa mga bata nga pabakunahan nga gilangkuban sa identification cards o birth certificates nga nagpamatuod sa edad niini, proof of relationship, ug pre-registration sa vaccinees alang sa Safe Davao QR. Target karon sa lokal nga kagamhanan ang mabakunahan ang 260,000 ka mga bata.
