DAVAO CITY – Gisugyot ni Eastmincom chief Lieutenant General Leonardo Guerrero ang pagmugna ug special Cafgus sa dakbayan alang sa mga balay pamatigayon aron nga mamentina ang seguridad sa ilang kompanya.
Kahinumduman nga ang Cafgu o Civilian Armed Forces Geographical Unit usa ka irregular auxiliary force sa Armed Forces of the Philippines.
Gipasalig ni Guerrero, nga andam ang gobyerno nga motabang sa bisan unsa man nga firms aron lamang mapanalipdan ang ilang area ingon man mosugyot sa mga negosyante nga momugna ug kaugalingon nila nga security forces.
Gipasabot sa opisyal atol sa Japanese Chamber of Commerce in Mindanao (JCCM)-organized Joint Foreign Chamber’s meeting nga gisalmutan sa 52 ka mga miyembro ang kasamtangang sitwasyon karon sa Mindanao luyo sa kabalaka sa mga negosyante nga posibleng maapektohan ang sektor sa pamatigayon dinhi sa Davao gumikan sa nasinatian nga krisis sa Marawi.
Samtang gipasabot ni JCCI President Keisuke Nakao, nagpatawag sumala pa sila ug tigom aron nga makakuha ug lihitimo nga impormasyon sa sitwasyon ug mapasalamaton sumala pa sila sa gihimo nga pagpasabot ni Guerrero.
Gitataw sab sa opisyao nga abli sumala pa ang kasundalohan partikular na ang ilang hotline number alang sa paghatag ug updates, briefings ug clarification kalabot sa isyu sa seguridad dinhi sa dakbayan.
