Misupak si Senate President Sherwin Gatchalian sa mga sugyot nga ipaubos ang age of criminal responsibility human sa nahitabong pagpamusil sa San Jose National High School sa Tacloban City nga mikalas sa kinabuhi sa tulo ka estudyante ug nakaangol sa 15 pa.
Sumala pa ni Gatchalian, wala’y angay usbon sa Juvenile Justice and Welfare Act o RA 9344, tungod kay adunay higayon nga mausab ug marehabilitar ang mga menor de edad pinaagi sa hustong giya, edukasyon ug mga programa sa Bahay Pag-asa. Dugang pa niini, iyang gipunting nga posibleng naimpluwensyahan sa marahas nga online games ug digital content ang mga nalambigit sa insidente, hinungdan nga iyang gisugyot ang pagdili sa paggamit sa social media sa mga batang edad 16 anyos paubos.
Sa laing bahin, nanawagan usab ang Amnesty International Philippines nga dili himuong rason ang maong trahedya aron ipaubos ang criminal age, ug gipahayag nga kinahanglan tutokan ang kakulang sa proteksyon ug suporta alang sa mga kabatan-onan. Sa kasamtangan, nagpadayon ang diskusyon kalabot sa mga lakang aron malikayan ang susamang mga insidente sa umaabot.
