Mibutar og pabor ang mayorya sa parliament sa South Korea alang sa impeachment ni Acting President Han Duck-Soo.
Milabay lamang ang duha ka semana human nga gipa-impeach sab sa mga South Korean lawmakers si President Yoon Suk-yeol gumikan sa deklarasyon niini og martial law.
Anaa sa kinatibok-an nga 192 ka magbabalaod ang mibuto og pabor alang sa impeachment ni Han, nga labaw pa sa 151 ka boto nga gikinahanglan aron mapasaka kini.
Giduso matud pa sa main opposition nga Democratic Party ang impeachment motion niadtong Huwebes human nga gibalibaran ni Han ang pagbutang og tao sa 3 ka bakante nga pwesto sa Constitutional Court nga maghukum sa impeachment trial ni Pres. Yoon.
Giakusahan sa oposisyon si Han nga nagdumili matud pa kini sa mga hangyo aron madayon ang proseso sa impeachment ni Yoon.
Apan, nagprotesta ang mga magbabalaod gikan sa ruling party ni Yoon ug Han, ang People Power Party (PPP), human nga gipahibalo ni National Assembly Speaker Woo Won-shik nga 151 na lamang ka boto ang gikinahanglan aron mapasaka ang impeachment bill.
Nagpasabot kini nga wala nay kinahanglan nga mga boto gikan sa mga magbabalaod gikan sa ruling party aron maimpeach si Han.
Gumikan sa maong panghitabo nagtapok ang mga miyembro sa parliament gikan sa ruling party, sa tunga sa botohan ug misinggit nga kini dili balido ug abuso sa gahum. Isip tubag, nanawagan kini alang sa pagpahawa sa pwesto sa House Speaker ug kadaghanan kanila miboykot sa botohan.
Samtang, masuspendi si Han gikan sa iyang mga katungdanan sa oras nga opisyal na kini nga maabisuhan sa parliament.
Susama sa kaso ni Pres. Yoon, kinahanglan pa nga kumpirmahon sa Constitutional Court ang impeachment ni Han, nga adunay 180 ka adlaw aron magdesisyon og padayonun ba nila ang impeachment ni Han.
Sumala pa ni Han, nga ginarespeto niini ang desisyon sa National Assembly ug maghulat na lamang sa desisyon sa korte.
