Nagmalampuson ang nahimong State of the Nation Address (SONA) ni Pangulong Bongbong Marcos Jr., diin mikabat kini og usa ka oras ug pito ka minuto.
Impunto alas-3:30 sa hapon miabot si Pangulong Marcos sa Kamara, sakay sa presidential chopper.
Pag-abot sa alas-3:58, gitawag ug gipaila-ila si PBBM sa session hall sa Kamara, ilhanan sa pagsugod sa iyang taho.
Duha ka minuto human niini, opisyal nang gi-call to order ang Kamara ug Senado, timaan sa pagsugod sa joint session sa ika-20 nga Kongreso.
Gisundan kini sa pag-awit sa Pambansang Awit nga gipangulohan ni The Voice Season 26 Grand Champion Sofronio Vasquez.
Sama sa naandan, lima ka lider sa simbahan ang nanguna sa panalangin sa wala pa ang pamahayag sa pangulo.
Sa maong pamahayag niini, iyang gipasundayag ang mga nahimo sa iyang administrasyon sa nagkalain-laing sektor, lakip na ang agrikultura, siyensya ug teknolohiya, transportasyon, internet connectivity, isports, seguridad sa pagkaon, depensa, sosyal nga serbisyo, sektor sa kuryente, ug uban pa.
