Gikanayon ni Kanhing Pangulo Rodrigo Duterte nga ang usa sa mga solusyon aron nga makontrol ang nagka-grabi nga traffic ning dakbayan sa Davao, mao ang pagpakatag og dugang nga mga traffic personel nga mumando sa mga kadalanan gumikan dili na matud pa makatabang ang mga traffic lights ilabi na og rush hour.
Sumala pa sa kanhing pangulo nga kinahanglan usab niini og tabang sa mga kapolisan aron nga hapsay ug labing madali ang dagan sa trapiko. Dugang pa niini nga kinahanglan matud pa og kapin 70 ka mga polis nga angay na ipakatag sa kadalanan.
Apan, bisan paman sa maong traffic, gipasigarbo sa kanhing pangulo na mao kini ang usa sa mga senyales nga naga-asenso ang dakbayan sa Davao, dili lamang sa Davao lakip sab niini ang mga kasikbit nga lugar.
Samtang una ng gibutyag ni kanhing CSC Chairperson Karlo Nograles nga ang mga awtoridad kinahanglan nga maghimo og komprehensibong ebalwasyon sa trapiko sa mga sakyanan, pasahero, ug mga pedestrian sa mga karsada ug magpatuman og mga gamay apan makatabang nga mga lakang aron mapagaan ang bug-at nga dagan sa trapiko.
Kahinumduman nga daghang mga dabawenyo ang nagpasibaw sa kasinatian sa pagbyahe niini gumikan sa kabug-at sa dagan sa trapiko dinhi sa syudad ilabi na ning pagsaulog sa holiday season.
