DAVAO CITY – Mosobra na sa katunga sa populasyon sa mga kabataan sa Davao ang natoplokan ug bakuna batok tipdas.
Pinasikad sa report sa City Health Office (CHO) mikabat na sa 124,463 ka mga kabataan ang nahatagan ug bakuna sa tipdas sukad nga gilusad ang Outbreak Response Immunization (ORI) program.
Una nang gi-angkon sa CHO nga mga saisenta porsiento na sa mga illegible recipient ang nangabakunahan ug gilauman nga pinaagi niini mapugngan na ang pagkaylap sa sakit nga tipdas.
Sa milabay nga bulan sa Enero mikabat sa dese siete ka mga kabataan ang kompirmado nga nagka-tipdas, samtang lain pang dosientos ang gituohan nga nataptan.
Tilimad-on sa sakit nga tipdas ang taas nga kalintura, pag-ubo, sip-on, pagpanakit sa totunlan, paghubag sa mata, katolkatol ug white spot sa nawong.
