DAVAO CITY – Gimugna na karon ang Special Investigation Task Group (SITG) aron nga imbestigahan ang pagpatay sa barangay kapitan sa Poblacion sa Monkayo lungsod sa Compostela Valley.
Matud pa kang Police Regional Office (PRO) Davao Region spokesperson Chief Inspector Milgrace Driz nga palawman sa kapulisan ang imbetigasyon sa kamatayon sa biktima nga si Danilo Nortega Daanton, 44, Barangay Kapitan sa Banlag ug residente sa Purok Guijo sa Monkayo.
Usa sab ka Nathaniel Medina Ilagan ang na-igo sa saag nga bala sa iyang tiyan dihang napusilan ang Barangay Kapitan. Hinuon luwas ang kahitang sa biktima ug nagpa-alim na kini sa Monkayo Health Center.
Matud pa kang Senior Superintendent Roderico A. Roy, Compostela Valley Provincial Police Office (CVPPO) acting director, nga ang gimugna nga SITG Punong Barangay Daanton ang gimugna aron nga mas mapalawman pa ang imbestigasyon sa krimen.
Sa ulahing imbestigasyon, palakaw na sa ilang pinuy-anan ang biktima sa Purok 9, Golden Plains Subdivisions, Barangay Poblacion sa Monkayo sakay sa iyang motorsiklo ug samtang nakighinabi kini sa iyang higalan, kalit nga miduol ang wala mailhing suspek ug gipusil ang biktima sulod sa pipila ka higayon nga maoy hinungdan sa kamatayon niini.
Narekober sa crime scene ang lima ka basiyo ug tulo ka slugs nga iya sa .45 nga pistola.
Gideklarang dead on arrival ang biktima sa Compostela Valley Provincial Hospital.
