Nakuratan ang mga residente ug motorista sa Purok 5A, Barangay Magdum, Tagum City human kalit mitumaw ang usa ka dakong bangag sa tunga sa kalsada, dapit sa agianan padulong sa Magdum National High School, nga gituohang usa ka sinkhole.
Dayon nga miresponde ang Tagum City Engineering Office human madawat ang sumbong sa mga lumulupyo nga nameligro ang kahimtangan sa dalan, ilabi na sa mga estudyante, magtutudlo, ug mga sakyanang kanunay moagi sa maong lugar.
Sa inisyal nga assessment sa buhatan, kapin duha ka metros ang gilawmon sa bangag, nga posibleng mo-lala pa kung dili dayon aksyunan.
Gipahayag sa engineering office nga usa sa gitan-aw nga hinungdan mao ang pagkadaut o pagkahugno sa culvert nga naa ilawom sa kalsada, nga posibleng nalusno tungod sa dugay nga exposure sa tubig ug bug-at nga mga sakyanan nga naglabay adlaw-adlaw.
Tungod sa risgo nga dala niini, temporaryong gibutangan og safety barriers ug warning signs ang dapit aron malikayan ang aksidente.
Gihangyo usab ang publiko nga likayan una ang maong dalan samtang ginahimo ang detalyadong inspeksyon ug andam na ang plano sa pag-ayo.
Gipaniguro sa lokal nga kagamhanan sa Tagum City nga paspas aksyunan ang problema aron mapanumbalik ang kaluwasan sa kalsada ug malikayan ang posibleng mas grabe pang kadaut, ilabi na nga duol kini sa eskwelahan ug residential area.
