DAVAO CITY – Nakurat ang pipila ka mga namaligya ug DVD human nga kalit na lamang sila nga girumbo sa mga sakop sa kapulisan ug Optical Media Board (OMB) kagahapon sa hapon.
Kahinumduman nga gipatuman ang operasyon human nga gilagdaan sa Davao City Police Office (DCPO) ug mga sakop sa OMB ang memorandum ug agreement (MOA). Partikular nga girumbo sa otoridad ang mga namaligya ug pirated DVD Brgy. 23- C Mini forest boulevard ning siyudad.
Wala nakabantay ang mga namaligya sanglit unang higayon sumala pa kini nga gi-raid sa kapulisan ang lugar.
Apan gibutyag ni Police Senior Inspector Leo Alsi, commander sa Sta. Ana PNP, nga human ang MOA signing gimando gilayon ni DCPO director Police Senior Supt. Alexander Tagum nga ilusad ang operasyon.
Apan gitataw sa opisyal nga dili lamang sa Mini-forest gilusad ang operasyon kung dili lakip na sa uban nga dapit sa dakbayan diin adunay namaligya ug peke nga mga DVD sama sa area sa DCLA, Magsaysay area, Agdao ug daghanan pa.
