DAVAO CITY – Mall sa dakbayan sa Davao gisulong sa mga mga terorista, mga tawo sa sulod gihimong bihag. Kini ang kalakip sa gihimo nga mga senaryo atol sa gilusad nga simulation exercise (SIMEX) sa Abreeza Mall, sa Bajada, ning dakbayan sa Davao.
Nasayran sa Bombo Radyo nga gisugdan ang nahisgutan nga kalihukan mga alas 7:00 kaganinang buntag diin nagkada-iya nga mga senaryo ang gi-respondehan sa mga sakop sa Davao City Police Office (DCPO), Task Force Davao (TFD), Eastern Mindanao Command (Eastmincom).
Gilakipan kini sa pagluwas sa mga hostage. Sumala pa kang Public Safety and Security Command Center (PSSCC) Chief Benito De Leon nga gipahigayon kini aron nga masuta ang mamahimong pagresponde sa mga tinugyanan sa balaod.
Unang nabati ang lanog nga pagbusikad nga gisundan sa pagsulod sa mga terorista sa mall ug gihimong bihag ang mga tawo sa sulod sa mall.
Sa gipahigayon nga operasyon sa mga tinugyanan sa balaod, naluwas ang tanan nga mga bihag ug napatay sab ang tanan nga mga terorista. Ang nahisgutan nga simulation exercise gipahigayon gumikan kay ang dakbayan sa Davao mao ang usa sa mga target sa mga posibling pagpangatake sa mga teroristang grupo.
Gawas sa mga entrance ug exit point sa dakbayan gihugtan na sab ang seguridad sa mga karagatan sa dakbayan.
