DAVAO CITY – Bisan nga kanselado na ang pipila ka mga aktibidad sa mga katolikong simbahan panahon sa Semana Santa, aduna pa gihapoy ipahigayon nga mga aktibidad ang simbahan sa social media diin mamahimo pa gihapon nga makighiusa samtang anaa sa mga panimalay.
Kahinumduman nga tungod sa nagpadayon nga bahad sa Covid-19 sa dakbayan, gibutyag sa Archdiocese of Davao nga subling ikansela ang pipika mga religious activities sa Holy Week.
Hinuon aduna pa gihapoy misa nga himuon sa mga simbahan ug mamahimo sab kini nga makita sa online. Sama sa milabay nga tuig, dili una ipahigayon ang Visita Iglesia (Church Visit) atol sa huwebes Santo sa Abril 1.
Dili na sab himuon ang Last Supper Mass sa susama nga adlaw ingon man ang tradisyon nga washing of the feet.
Gani kanselado na sab ang mga aktibidad atol sa Biyernes Santo sa Abril 2 sama sa Way of the Cross (Via Crusis), Easter vigil sa Black Saturday, ug ang sugat o pasko sa pagkabanhaw sa Abril 4.
Tipik lamang ang maong lakang human ang panawagan ni Mayor Inday Sara Duterte-Carpio nga likayan una ang pagtapok-tapok aron nga mapugngan ang pagsaka sa kaso sa Covid-19.
