DAVAO CITY – Natala sa dakbayan ang sunod-sunod nga sunog kagahapon ug hangtod karong adlawa nga miresulta sa pagkadanyos sa mga istruktura ingon man mga kabtangan sa mga residente nga apektado sa sunog.
Kaganihang buntag pasado alas Nuybi, miulbo ang kalayo sa Purok 26, riverside Maa ning syudad nga miresulta sa pagka-ugdaw sa napulo ka mga panimalay.
Kapin napulo usab ka mga pamilya ang temporaryo nga gipahiluna sa usa ka covered court sa nasampit nga lugar.
Samtang kagahapong adlawa, naugdaw usab ang walo ka mga panimalay sa nahitabong sunog sa Brgy. Centro South San Juan, Agdao, ning syudad sa Davao pasado alas nuybi sa buntag. Gituohan nga linya sa kuryente ang hinungdan sa sunog.
Samtang miulbo usab ang sunog pasado alas Una kagahapon sa hapon sa Sitio Central 1, Brgy. Binugao, Toril ning syudad diin usa ka underconstruction building ang nasunog.
Samtang pasado alas Dos kagahapon usab sa hapon, niulbo ang sunog sa Farland, Dumoy, Toril, diin walo ka mga panimalay ang ugdaw ug usa ka simbahan.
Subay sa report mga otoridad siyam ka mga indibidwal ang apektado sa nasampit nga sunog, Sa gihimong imbistigasyon, nagsugod ang sunog sa panimalay sa pamilyang Cajes nga gama sa light materials.
Dali usab nga mikuyanap ang kalayo tungod sa mga light materials ang mga panimalay.
Sa pagkakaron, padayon nga gina-imbestigahan sa kabomberohan ang hinungdan sa pag-ulbo sa mga nahitabong sagunson nga sunog ingon man ang kinatibuk-an nga kantidad sa danyos.
