DAVAO CITY – Usa ka kawatan sa Brgy. Tubod, Carmen, Davao del Norte ang tingkagol sa prisohan human gikataho nga nagransak sa panimalay sa iyang silingan kagahapon sa kaadlawon.
Sumala sa imbestigasyon sa Carmen Municipal Police, giila ang suspek nga si alyas Yors, hamtong ang panuigon, taga-Sierrabullones, Bohol, apan nagpuyo sa Brgy. Tubod, Carmen.
Subay sa imbestigasyon, bandang ala-una sa kaadlawon dihang nisulod si alyas Yors sa panimalay sa usa ka alyas Lynlyn, residente sa maong barangay.
Nakahigayon ang kawatan og pangulimbat sa usa ka smartphone ug ang kwartang mubalor sa P7,000.
Wala na kapangayo ug tabang ang biktima gumikan sa kahadlok, apan gilayon kini nga gireport sa kapulisan bandang alas-diyes sa buntag.
Nagpahigayon dayon ug operasyon ang mga otoridad ug malampusong nadakpan ang suspek.
Gihikay na ang ipasakang kaso nga Theft batok sa maong suspek.
via || Bombo LJF
