Gipadali sa Department of Public Works and Highways (DPWH) ang konstruksyon sa 4.76-kilometer nga Samal Island–Davao City Connector (SIDC) Project, usa ka four-lane bridge nga magdugtong sa Davao City ug sa Island Garden City of Samal (IGaCoS). Kini nga tulay gilangkuban og modernong disenyo ug dakog papel sa kalambuan sa transportasyon sa rehiyon.
Sa pinakabag-ong inspection report nga gisumite kang DPWH Secretary Manuel M. Bonoan, gibutyag ni Senior Undersecretary Emil K. Sadain nga sobra na sa 12 porsyento ang overall physical accomplishment sa proyekto. Gitutokan karon ang mga trabaho sa substructure o pundasyon sa tulay. Sa structural works, nahuman na ang 74 ka bored piles sa east land viaduct sa Samal side, 73 sa 110 bored piles sa west land viaduct sa Davao City side, ug 4 sa 26 ka 10-metros nga taas nga mga column. Nahuman na usab ang 48 ka bored piles para sa navigation bridge sa duha ka pikas.
Pagahumanon ang proyekto sa tuig 2028, nga maglakip sa 530-meter main span nga extradosed bridge, mga viaducts, ramps, ug at-grade road nga adunay roundabout sa Barangay Limao, Samal. Ang tulay adunay vertical navigational clearance nga 47 metros ug gisuportahan sa duha ka 73-metro nga pylons. Sa pagtapos niini, ang SIDC ang mahimong pinakataas nga tulay sa Mindanao, nga maghatag og dakong kaayohan sa kalambuan ug konektibidad sa rehiyon.
