DAVAO CITY – Nagpabilin pa gihapon nga dili luwas ang pagkaon ug mga shellfish sa Balite Bay sa Mati City Davao Oriental kini human nga nagpositibo pa gihapon kini sa red tide.
Subay sa bag-ohay pa lamang nga laboratory results nga gipahigayon sa monitoring sa Bureau of Fisheries and Aquatic Resources ingon man sa lokal nga kagamhanan, nagpositibo sa red tide ang mga nakuhang kinhason sa mga baybayon nga sakop sa Balite Bay sa Mati, Davao Oriental.
Tungod niini, nagpahimangno ang otoridad nga dili luwas ang pagkaon kinhason ingon man ulang nga makuha sa nahisgutan nga mga dapit tungod sa red tide.
Apan gikanayon sa BFAR nga luwas pa gihapon nga kaunon ang mga isda, nokos, pasayan, ingon man alimango ug kasag apan kinahanglan nga presko kini ug mahugasan kini ug tarong ayha lutuon.
Gikanayong sa mga pasayan, kinahanglan tanggalon ug dili kaunon ang ulo o ang sulod niini. Samtang sa mga alimango o kasag, ginadili ang pagkaon sa aligue niini.
Kahinumduman nga dili lamang kini ang unang higayon nga kontaminado sa red tide ang shell fish sa lugar.
