DAVAO CITY – Gipirmahan ni Davao City Mayor Sebastian Baste Duterte ang kasabutan tali sa bag-ong sister city nga Sennan City sa Osaka Prefecture, Japan.
Nakamugna ang maong Sister City Agreement sa usa ka Sister-City Relationship tali sa duha ka lungsod sa natad sa Edukasyon, Cultural and Medical Welfare Exchange, turismo ug pamatigayon.
Malipayon sab nga gidawat ni Sennan City Mayor Yamamoto Yuma ang tibuok delegasyon sa Davao City nga midayo pa sa maong lungsod sa Japan alang sa gipahigayong MOA signing niadtong nakalabayng simana.
Gipangunahan ni Mayor Baste ang delegasyon gikan Davao City kauban ang mga representante sa mga nagkalain-laing sangay sa Davao City LGU ug pipila ka mga opisyales sa gobyerno.
Gikabutyag nga nagpadala og proposal si kanhi Sennan City Mayor Isato Takenaka kaniadtong 2019 nga nagtumong sa ilang takus nga pakig-alayon sa mga programa nga gilaumang magpa-uswag sa dakbayan sa Davao.
Ang Sennan City sa Osaka Prefecture ang ikaduhang Japanese sister city sa dakbayan human sa Kitakyushu City sa Fukuoka Prefecture.
via || Bombo LJF
