Nalumos ug namatay ang usa ka 63-anyos nga lalaki nga giilang si Gregorio Deuna human kini makita nga naglutaw sa dagat sa likod sa ilang balay sa Purok Sumikap-1, Barangay Matiao, kagabii.
Sumala sa anak sa biktima, milakaw pa ang iyang amahan padulong sa dagat pasado alas-6 sa gabii, apan wala na kini mobalik. Pagpangita nila, ilang nakita nga naglutaw na sa tubig ang biktima.
Dali-daling mitabang ang mga silingan ug ang rescue team sa Mati City.
Samtang, gisulayan sab nila og CPR ug gidala pa kini sa tambalanan, apan wala na kini na-revive ug gideklarar nga patay sa pag-abot sa health center. Matod sa pamilya, wala may sakit nga gibati ang biktima sa miaging mga adlaw.
Posible nga nalisdan kini sa pagginhawa o nakuyapan samtang naligo sa dagat. Padayon pa karon ang imbestigasyon sa mga otoridad aron masayran kung unsa gyud ang hinungdan sa iyang pagkamatay.
Giingnan usab sa mga pulis ang mga residente nga mag-amping labi na sa mga tigulang nga mahilig moligo o molingkod duol sa dagat, tungod kay delikado ang kusog nga balod karong panahona.
