DAVAO CITY – Ipahigayon na karong adlawa ang send off ceremony sa tanang personahe nga ipadala sa pagbantay sa Midterm Elections 2019.
Hinuon kini sa Police Regional Office (PRO) 11 Grandstand, Camp Quintin Merecido, Buhangin, Davao City.
Sumala pa kang Davao City Police Office (DCPO) Director Police Col. Alexander Tagum gisapinal na nila ang deployment ug security support gikan sa Davao City Police Office ngadto sa Comelec.
Dugang pa ni Col. Tagum nga naadtoan na sa ilang mga security personnel ang tagsa-tagsa ka mga area of responsibility sa adlaw sa eleksyon, hinungdan nga andam na sila sa himoong deployment karong adlawa.
Gitataw usab ni Tagum nga walay hotspot area ang natala dinhi sa syudad, apan dunay mga area of concern sa pipila ka mga lugar nga kinahanglan nga bantayan gumikan sa presenya sa mga rebeldeng grupo nga New People’s Army (NPA) aron masiguro nga walay mahitabong problema sa adlaw sa eleksyon.
Magsugod ang send-off ceremony alas otso karong buntag diin laoman nga motambong si Regional Election Director Atty. Michael Abas ug uban pang representante gikan Department of Education (DepEd).
