Gitugyan na sa Office of the Ombudsman ang pagpanguna sa imbestigasyon sa giingong mga anomalya sa flood control projects human gipasa sa Senate Blue Ribbon Committee ang maong kaso.Sumala ni Senate Blue Ribbon Committee Chairman Sen. Erwin Tulfo, tumong sa maong lakang ang pagpadali sa imbestigasyon ug paglikay sa pagdoble sa mga proseso nga gihimo sa nagkalainlaing ahensya.
Dugang pa niini, nagkauyon sila ni Senate President Sherwin Gatchalian ug Ombudsman Jesus Crispin “Boying” Remulla nga ang Ombudsman na lamang ang manguna sa tanang imbestigasyon nga may kalabotan sa flood control projects. Gipahigayon ang ilang panagtigom kagahapong adlawa, Biyernes sa opisina sa Ombudsman sa Quezon City. Matud pa ni Tulfo, gisugdan na usab sa Ombudsman ang paggamit sa mga dokumentong gisumite sa Independent Commission for Infrastructure isip kabahin sa imbestigasyon.
Lakip sa giimbestigahan ang pipila ka mga kongresista, contractors, mga opisyal sa gobyerno, pipila ka mga senador ug uban pang hataas nga opisyal. Sa kasamtangan, nagpadayon ang imbestigasyon sa Ombudsman, busa giingon ni Tulfo nga dili na manghilabot ang Senate Blue Ribbon Committee aron dili maantala o maapektuhan ang legal nga proseso.
