Midesisyon ang Senado nga i-archive una ang impeachment case batok kang Bise Presidente Sara Duterte.
Ang maong lakang gibuhat isip pagtuman sa final ug executory nga desisyon sa Korte Suprema nga nagbasura sa mga reklamo sa impeachment.
Dunay 19 ka mga Senador ang miboto pabor sa pag-archive sa kaso, upat ang misupak, samtang usa ang wala mopili o nag-abstain.
Ang mga miboto pabor mao sila: Senador Alan Peter Cayetano, Pia Cayetano, Ronald Dela Rosa, JV Ejercito, Francis Escudero, Jinggoy Estrada, Sherwin Gatchalian, Bong Go, Lito Lapid, Loren Legarda, Rodante Marcoleta, Imee Marcos, Robinhood Padilla, Erwin Tulfo, Raffy Tulfo, Joel Villanueva, Camille Villar, Mark Villar, ug Juan Miguel Zubiri.
Samtang ang mga misupak mao sila: Senador Paolo Benigno “Bam” Aquino IV, Risa Hontiveros, Francis “Kiko” Pangilinan, ug si Vicente “Tito” Sotto III. Samtang si Senador Panfilo Lacson wala mi botar kon nag-abstain.
Kahibaloang si Senador Rodante Marcoleta ang unang misugyot nga ibasura na lamang ang impeachment case batok kang Bise Presidente Duterte, hangtod nga midangop na lang sa desisyon nga archive na lamang usa kini.
Gipasabot sab ni Senador Alan Peter Cayetano nga ang pagbutang sa kaso sa archive dili nagpasabot nga kini patay na, apan mahimong mabuhi pag-usab kon balihon sa Korte Suprema ang ilahang desisyon.
