Gipahayag ni Sen. Robin Padilla nga migamit pa siya og Google aron masabtan ang mga legal nga termino nga may kalabotan sa iyang pagkontra sa paglingkod ni Senador Francis Escudero isip presiding officer sa impeachment trial batok kang Vice President Sara Duterte.
Sumala pa kang Padilla, napugos siyang mangita og dugang nga kasayuran pinaagi sa Google aron masabtan ang legal nga mga termino nga gigamit sa maong proseso. Matud pa niya, wala siya makagradwar sa mga unibersidad sama sa UP ug Ateneo, kundili sa kursong Criminology ug sa iyang gihulagway nga “University of Prison.”
Dugang pa niini, lakip si Padilla sa walo ka mga senador nga mibotar batok sa paglingkod ni Escudero isip presiding officer sa impeachment trial atol sa pagdungog kagahapong adlawa, Hulyo 6. Kahinumduman, gibarugan sa Senate minority bloc nga si Senate President Sherwin Gatchalian ang angay unta nga mopangulo sa impeachment court, subay sa ilang pagsabot sa gilatid sa 1987 Constitution.
Sa kasamtangan, gibarugan gihapon ni Padilla nga kinahanglan sundon sa Senado ang tin-aw nga gisulti sa Konstitusyon kabahin sa kinsa ang angay molingkod isip presiding officer sa impeachment trial kon ang giatubang nga respondent mao ang Bise Presidente. Matud pa niya, ang balaod dili angay usbon, baluktoton o hubaron sumala lamang sa personal nga opinyon, kondili kinahanglan sundon sumala sa gitakda nga gisulat niini.
