DAVAO CITY – Kampante nga gibutyag ni Senator Manny Pacquiao nga tinuod ang iyang gipangyagyag nga adunay grabe nga korapsiyon sa pipila ka mga ahensiya sa kagamhanan.
Sa pakighinabi sa bomboradyo kang Pacquiao, gikanayon niini nga adunay kamatuoran ang pahayag sa Commission on Audit (COA) nga naghitak ang korapsiyon sa gobyerno hinungdan nga usa kini sa iyang hatagan ug pagtagad.
Gitino sab niini nga wala siya namakak ug tinuod ang iyang mga gipangyayag.
Gawas sumala pa sa gipagula nga report sa COA, gikanayon sab sa opisyal nga daghanan pa nga mga korapsiyon ang nahitabo karon sa mga nagkadaiyang buhatan sa gobyerno.
Subli sab nga gibutyag ni Sen. Pacquiao nga wala niya gikalaban si Pangulong Rodrigo Duterte apan wala lamang siya nakauyon sa pagdepensa sa mga Pangulo sa pipila ka mga opisyal sa kagamhanan kinsa nalambigit sa korapsiyon.
Gani sukad sumala pa nga milingkod siya sa katungdanan, gitutukan na matud pa niya ang pipila ka mga isyu sa korapsiyon sa kagamhanan lakip na kadtong mga proyekto nga gihimong “gatasan” sa pipila ka mga politiko.
