Andam sumala pa si Senate President Pro Tempore Ping Lacson nga maghatag og personal nga tambag kang Senador Ronald “Bato” dela Rosa kalabot sa posibleng warrant of arrest gikan sa International Criminal Court (ICC) batok kaniya.
Matod ni Lacson, nitawag siya kang Dela Rosa tulo ka adlaw ang milabay aron maghatag og moral support isip kanhi kauban sa Philippine National Police (PNP), apan wala kini mitubag sa tawag.
Pagka-ugma, si Dela Rosa mismo ang mitawag balik, apan wala na pud kini natubag ni Lacson.
Gipasabot ni Lacson nga ang iyang tuyo mao lamang ang paghatag og tambag ug dili aron magtago, apan aron masayran ni Dela Rosa kung unsaon pag-atubang sa kaso sa hustong pamaagi.
Dugang niya, mas komplikado ang kahimtang ni Dela Rosa karon tungod kay ang kaso anaa sa International Criminal Court, dili lamang sa lokal nga korte sama sa iyang kasinatian ug sa uban pang senador.
Sa dihang gipangutana si Lacson kung tudluan ba niya si Dela Rosa kung unsaon magtago, mitubag siya sa komedya nga kung magdesisyon si Dela Rosa nga magtago, tudluan daw niya, apan giklaro niini nga ang otoridad gihapon ang adunay katungod sa pagdakop.
Gipasabot usab ni Lacson ang limitasyon sa parliamentary immunity kung mosulay si Dela Rosa nga magpabilin sa Senado aron malikayan ang pag-aresto.
Bisan pa niini, iyang gibutyag nga ang kadaghanan sa mga senador mosuporta sa pamahayag ni Senate President Tito Sotto nga ang korte dapat respetuhon ug dili lang basta-basta mag-aresto sulod sa Senado.
Samtang kabahin niini, nangayo na si Senate President Vicente “Tito” Sotto III og legal nga opinyon kabahin sa angay nga lakang sa Senado kung matinuod nga ipaaresto sa ICC si Dela Rosa.
Sumala ni Sotto, wala pa siyay kumpirmadong impormasyon nga adunay warrant of arrest batok kang Dela Rosa, ug wala pa niya kini nakontak karong panahuna.
Mas gipili ni Sotto nga mangayo og tambag sa mga eksperto kaysa maghatag sa iyang kaugalingong opinyon, kay kon mosulti siya diretso, kasagaran ma-misinterpret ug makadawat siya og kritisismo.
Dugang pa, giklaro na usab ni Sotto kaniadto nga dili tugotan sa Senado ang pag-aresto kang Dela Rosa o bisan kinsa nga senador samtang anaa sulod sa Senado, ilabi na panahon sa sesyon.
Iyaha pa gyud nga gibutyag nga dili kini porma sa pagpanalipod kang Dela Rosa, apan usa ka pagprotekta sa Senado isip institusyon nga angay respetuhon.
