Giduso ni Sen. Joel Villanueva ang pagrepaso sa access sa social media sa mga kabataan nga 15 anyos paubos human sa nahitabong madugoon nga pagpamusil sulod sa usa ka tulunghaan sa Tacloban City niadtong Lunes, Hunyo 22. Gipadayag ni Sen. Villanueva nga ang maong trahedya nagpamatuod sa panginahanglan sa mas hugot nga pagmonitor sa mga butang nga mahimong makaapekto sa kinaiya sa mga kabataan, ilabina ang ilang paggamit sa social media ug pagkalantad sa makadaot nga online content.
Matud pa ni Sen. Villanueva, ang nahitabong pagpamusil nagpakita sa panginahanglan sa mas hugot nga proteksyon alang sa mga kabataan, lakip na ang mga panukalang magpatuman og mas hugot nga mga lagda sa paggamit sa social media sa mga menor de edad nga 15 anyos paubos. Dugang pa niini, wala pa maaprubahan sa Kongreso ang pipila ka mga gisugyot nga balaod nga nagtumong sa pagpatuman og mas hugot nga mga lagda sa paggamit sa social media sa mga menor de edad.
Gisuportahan usab ni Sen. Villanueva ang pagpalig-on sa mental health programs sa mga tulunghaan pinaagi sa pagdugang sa gidaghanon sa guidance counselors aron mas matubag ang emosyonal ug sikolohikal nga panginahanglan sa mga estudyante.Lakip sa iyang mga gisugyot ang pagpalig-on sa mga safety measures sa mga eskwelahan pinaagi sa mas epektibong threat assessment, mas lig-on nga koordinasyon tali sa mga tulunghaan, ginikanan, lokal nga panggamhanan ug mga law enforcement agencies.
Giduso usab sa senador ang pagpalapad sa anti-bullying programs ug pagrepaso ug pagbag-o sa emergency response plans aron mas andam ang mga eskwelahan sa pag-atubang sa posibleng mga hulga sa kaluwasan. Sa pagkakaron, padayon ang mga panawagan alang sa mas hugot nga proteksyon sa mga kabataan human sa sunod-sunod nga mga insidente nga nalambigit sa mga estudyante sa nagkadaiyang bahin sa nasud.
