Nagpakita sa iyahang kaandam aron nga mahatagan og katin-awan ni Senador Ronald “Bato” dela Rosa ang iyang nahimong papel sa war on drugs ni kanhi Pangulong Rodrigo Duterte.
Gihimo ni Dela Rosa ang maong pamahayag isip tubag sa panawagan ni Philippine National Police (PNP) Chief Rommel Marbil nga klaruhon ang ilahang kalambigitan sa kampanya.
Matud sa senador nga uyon kini ug wala kini supak sa maong panawagan ug andam kini nga motubag sa maong hisgutanan.
Nasayran nga ang panawagan ni Marbil nunot sa pag-angkon ni retired P/Col. Royina Garma kabahin sa sistema sa pagbayad og ganti sa pagpatay sa mga drug suspect atol sa war on drugs ni Duterte.
Ang kasamtangang hepe sa PNP mibutyag nga ilahang gidawat kining mga alegasyon nga “seryoso kaayo” ug siguruhon ang transparency sulod sa ilang mga han-ay.
Kahinumduman nga si Dela Rosa, maoy hepe sa PNP atol sa pagpatuman sa war on drugs,una ug nang gilimod nga wala kini nahibal-an kabahin sa reward system sa mga pulis nga nalambigit sa anti-narcotics operation ni Duterte ug nagkanayong wala’y pundo ang organisasyon alang sa maong rewards.
Kahinumduman nga gawas kang Garma, gikanayon sab ni Lt. Col Espinido sa nakalabay nga pagdungog nga adunay reward system sa kapulisan diin ang pondo naggikan sa POGO.
