Gi-awhag ni Senador Bong Go, chairman sa Senate Committee on Sports ug Senate Committee on Youth, ang tanang investigating bodies nga nag-imbestigar sa kaso sa mga student-athletes nga sila Rene Baterbonia ug Divine Adili, nga ipagawas ang tibuok kamatuoran aron malikayan ang pag-usab sa susamang trahedya.
Sumala kang Go, importante nga mahibal-an ang tinuod nga nahitabo aron mapalig-on ang mga lakang sa pagpanalipod sa mga batang atleta ug mapugngan ang susamang insidente sa umaabot.
Dugang pa niini, kauban ni Senador Bam Aquino, gipasiugda usab ni Go ang kamahinungdanon sa pagpasa og mga balaod nga maghatag og dugang proteksiyon ug suporta sa mga atleta.
Lakip sa iyang gipunting nga ang mga batan-ong atleta kinahanglan hatagan og hustong pag-atiman ug oportunidad aron mapadayon ang ilang mga damgo pinaagi sa sports ug mapanalipdan ang ilang kaayohan.
Matod pa ni Go, ang nahitabong insidente nagsilbing pahimangno nga kinahanglan pang palig-onon sa gobyerno ug mga institusyong pang-edukasyon ang ilang mga mekanismo sa paghatag og seguridad, giya ug suporta sa mga estudyanteng atleta.
Kahinumduman nga tumong sa mga gisugyot nga balaod nga ilang gipasiugdahan dili lamang ang pagpanalipod sa kaluwasan sa mga estudyante, kondili usab ang paghatag kanila og patas nga oportunidad aron matuman ang ilang mga pangandoy.
Sa kasamtangan, nagpadayon ang Senado sa pagtan-aw sa posibleng mga reporma ug mga polisiya nga makatabang sa pagpalig-on sa proteksiyon ug kapakanan sa mga student-athletes sa tibuok nasud.
