Gisuportahan ni Sen. Bam Aquino ang dugay nang panawagan ni Sen. Alan Peter Cayetano batok sa child stunting o kakulang sa nutrisyon sa mga bata nga giingong usa sa mga hinungdan sa krisis sa edukasyon sa nasud.
Sa iyang sponsorship speech alang sa Expanded National Nutrition Program Act, gibutyag ni Sen. Aquino ang kamahinungdanon sa hustong nutrisyon sa unang mga tuig sa kinabuhi sa bata.
Sumala pa kaniya, tumong sa maong balaodnon nga masulbad ang problema sa malnutrition pinaagi sa feeding programs, universal health record ug direktang pagpamalit og mga utanon ug isda gikan sa lokal nga mga mag-uuma ug mangingisda.
Dugang pa niini, giingon ni Sen. Cayetano nga malungtarong epekto ang pagkabansot sa paglambo sa utok, resistensya ug produktibidad sa usa ka bata.
Subay sa datos, mokabat sa 26.7 porsyento sa mga batang Pilipino nga ubos sa lima ka tuig ang edad ang nag-antos sa stunting o kakulang sa nutrisyon, nga halos usa sa matag upat ka kabataan sa nasud.
Sa pagkakaron, gisuspenso pag-usab sa Senado ang deliberasyon sa maong balaodnon ug gitakdang ipadayon kini sa sunod nga sesyon.
