DAVAO CITY – Kasamtangang nagpaalim sa ospital ang sekyu nga gipusil sa iyang kaubanang sekyu sa Toscana Subdivision, Bago Gallera, Davao City, kagahapon sa kaadlawon.
Giila sa Baliok Police ang biktima nga si Jimboy Canumay, 21 anyos. Sumala pa sa head guard sa subdivision, alas-dose sa kaadlawon dihang nakamata kini sa pagbuto sa pusil.
Paggawas sa post, dihang nakit-an na lamang nga nagbuy-od na sa kaugalingong dugo ang biktima nga naigo sa may bagol-bagol nga bahin sa lawas.
Sumala pa ni imbestigador nga si PCol. Antonio Villaver, pagpangsina ang posibleng hinungdan sa pagpamusil sa suspek sa biktima sanglit gibutyag sa kaipon sa biktima nga nag-selos matud pa ang suspek sa iyang kaubanan.
Nagpadayon gihapon ang Baliok PNP sa pag-locate sa suspek nga wala na nagpakita sa gibantayang subdivision human sa maong insidente ug naghupot gihapon og pusil nga giisyu sa iyang security agency.
via || Bombo HJR & Bombo LJF
