DAVAO CITY – Gipahimangnoan ni Davao City Mayor Inday Sara Duterte-Carpio ang mga government employees nga gidili karon ang pagpahigayon ug sekreto nga Christmas party karong kapaskohan.
Kahinumduman nga daghan ang nangutana kung gitugot ba sa lokal nga kagamhanan ang pagpahigayon ug Christmas parties ilabi na nga aduna sumala pay pipila ka mga government offices nga planong magpahigayon ug party bisan nga nagpabilin ang bahad sa Covid-19.
Gipahimangnoan sab sa Mayor ang national government offices nga dili sab magpahigayon ug susama nga aktibidad.
Tin-aw sumala pa sa gipagulang executive order (EO) sa lokal nga kagamhanan nga ang mga dagkong panagtigom ang hugtanon nga gidili.
Hinuon giklaro sa Mayor nga bugtong sakop lamang ang nahisgutan nga prohibition ang mga pampublikong buhatan ug establisyemento ug dili ang residential areas.
Subli sab nga gipasabot niini ang mga risgo nga mamahimong makuha panahon sa panagtapok ilabi na karon nga pabilin pa nga taas ang kaso sa Covid-19 dinhi sa dakbayan.
