DAVAO CITY – Hugtanon ang pagpangandam karon sa Davao City Police Office (DCPO) alang sa ipatuman nga seguridad sa nagsingabot nga selebrasyon sa Chinese New Year sa Pebrero 15 sa Rizal Park ning dakbayan.
Matud pa kang Sr. Insp. Maria Teresita Gaspan, tigpamaba sa DCPO, nga susama pa gihapon nga security measures sa milabay nga tuig ang ilang ipatuman apan mas focus pa gihapon sila subay sa mga sumbanan sa mipatigbabaw nga balaud martial law.
Hugtanon pa gihapon nga idili atol sa selebrasyon ang backpack ilabi na sa mga areas diin ipahigayon ang mga nag-unang aktibidad. Mihangyo na sab ang DCPO ug augmentation gikan sa Regional Public Safety Battalion aron motabang s apagpatuman ug seguridad sa nahisgutan nga aktibidad.
Gitataw sab ni Gaspan nga wala pa sila nakadawat ug bisan unsa man nga bahad apan dili pa gihapon sila mokumpiyansa ilabi na nga usa ang dakbayan sa Davao sa mga target sa terorista.
Samtang sa pikas nga bahin, andam na sab ang Chinatown Development Council alang sa pagtagbo sa Year of the Dog diin adunay mga aktibidad nga ipahigayon atol mismo sa countdown sa Chinese New Year nga magsugod sa Pebrero 15 sa Rizal Park.
Matud pa kang Jasper Huang, tigpamaba sa Chinatown Development Council, nga ang ilang gihan-ay nga mga aktibidad dili lamang sa Chinese community sa siyudad kung dili abli sab kini sa publiko.
