DAVAO CITY – Arun nga mas mapalig-on pa ang anti-covid vaccination sa dakbayan, gikanayon sa Davao City Covid-19 Task Force nga ilang ipatuman karon ang sectoral mobile vaccination alang sa booster dose vaccines aron nga dad-on ang paduol ang booster ngadto sa mga Dabawenyos.
Sumala pa kang spokesperson Dr. Michelle Schlosser, target sa booster dose ang mga magtutudlo ug security personnel ingon man mga sakop sa Philippine National Police (PNP)-Davao City Police ug Armed Forces of the Philippines (AFP).
Tipik lamang kini human nga nakasinate pa gihapon ang dakbayan ug low turn out sa booster dose administration bisan nga bastante ang supply karon sa bakuna ingon man igo ang mga vaccination sites.
Gani, bugtong 2,895 booster doses ang na-administer gikan sa target nga 15,942 atol sa Bayanihan Bakunahan: National Vaccination Day Part 4. Nasayran nga anaa sa 44.13 percent sa mga magtutudlo sa siyudad ang nabakunahan na ug booster dose pinaagi sa initial run sa sectoral mobile vaccination alang sa booster doses.
Sa susama nga panahon, 3,648 members sa security cluster ang nakadawat na sab ug booster dose.
Nasugdan na ang mobile booster dose vaccination sa Bureau of Jail Management and Penology (BJMP)-Davao ug Bureau of Fire Protection (BFP) apan plano pa gihapon sa ahensiya nga daghanan pa nga mga empleyado sa maong buhatan ang mabakunahan.
Dugang niini, laraw sab karon sa Task Force nga dad-on ang mobile booster dose vaccination drive gikan sa usa ka establisyemento paingon na sa lain pa arun nga mas duol na lamang ang booster dose sa mga anaa sa private sector.
