DAVAO CITY – Hugtanon ang pahimangno karon sa ahensiya sa Securities and Exchange Commission (SEC) ngadto sa publiko nga likayan ang pag-invest sa XIAN COIN (“XNC”).
Una ng nakadawat ug impormasyon ang ahensiya nga usa ka Mr. CHRISTIAN ALBERT GAZA (“Xian Gaza”), lakip na ang pipila ka mga indibidwal nga representante sa XIAN COIN ang naga-awhag sa publiko nga mag-invest sa ilang “digital currency”.
Dili sumala pa kini rehistrado sa SEC ug walay tukma nga lisensiya ang mga nahisgutan aron nga mangolekta ug investment gikan sa publiko dinhi sa nasod hinungdan nga usa ka tin-aw nga pagsupak kini sa Securities Regulation Code sa Pilipinas (SRC).
Dili sab sumala pa kalakip ang XIAN COIN sa mga rehistradong banko, exchanges o kompanya nga nakatutok sa digital assets sa Bangko Sentral ng Pilipinas (BSP) ug kinahanglan nga mokuha ug Certificate of Authority subay sa BSP Rules and Regulations.
Nanawagan karon ang Sec sa publiko nga kung adunay nasayran nga mga impormasyon kalabot sa nahisgutan nga mga aktibidad sa mga tawo nga nagdumala sa susama nga operasyon, mas maayong makiglambigit sa Enforcement and Investor Protection Department pinaago sa email address nga epd@sec.gov.ph.
Una ng nagpahimangno si Simplicio Sagarino, head sa SEC Davao sa publiko nga kung buot mobubo ug puhunan, mas maayo sumala pa nga mobisita sa ilang buhatan aron nga masayran kung lihitimo kini nga kompanya.
