Naglaom si DOE Sec. Sharon Garin nga magamit na sa labing dali nga panahon ang Malampaya East-1 aron makatabang sa nagkagrabe nga oil crisis sa nasud.
Sa paghinabi ngadto kang Sec.Garin sumala pa niini nga kung magpadayon pa sulod sa pipila ka bulan ang giyera sa Middle East, posible nga magamit dayon ang bag-ong nadiskubreng gas reserve basta magpadayon ang exploration ug development sa Malampaya Gas Field.
Sumala niya, nagsilbing proteksyon sa oil industry sa Pilipinas ang Malampaya tungod kay adunay lokal nga reserba sa enerhiya ug dili na kinahanglan mag-angkat gikan sa mga oil-producing countries.
Apan gipasabot sa kalihim nga dili pa sigurado kung mohaom kini sa energy mix sa nasud, tungod kay kinahanglan pang sulbaron ang pipila ka teknikal nga isyu.
Bisan pa niini, nakiglambigit na ang gobyerno sa mga investor sa gas field aron tan-awon kung mapaspasan pa ang proseso sa paggamit sa bag-ong nadiskubreng reserba.
Niadtong Enero 19, 2026, gipahibalo ni Pang. Ferdinand Marcos Jr. ang pagkadiskubre nga hangtod sa 98 billion cubic feet nga natural gas sa maong lugar.
Tungod niini, gipalig-on sa Armed Forces of the Philippines ang pagbantay sa lugar tungod kay duol kini sa mga teritoryo sa Pilipinas nga ginaangkon sa China.
Ang Malampaya East-1 nahimutang mga lima ka kilometro sa sidlakan nga bahin sa Malampaya Gas Field.
