DAVAO CITY – Luyo sa nasinatian nga Covid-19 crisis, subling mipahimangno ang Securities and Exchange Commission (SEC) Davao Extension Office sa publiko batok sa text scam nga migamit sa pangalan ni Pangulong Rodrigo Duterte.
Sumala sa SEC, dili gilayon motuo ang publiko sa mga text message nga nagkanayong makadaug ug P750,000 pinaagi sa usa ka “electronic raffle” nga gi-organisa sumala pa “President: Rodrigo Duterte Charity Foundation.”
Gitataw sa SEC nga ang nahisgutan nga foundation dili rehistrado isip corporation o kabahin sa Policy and Specialized Supervision Sector sa Bangko Sentral ng Pilipinas (BSP).
Ang nahisgutan nga electronic raffle usa sab sumala pa ka peke. Gikanayong ang mga mangingilad ang mangayo sumala pa ug kuwarta sa ilang mga biktima ayha matud pa nila ma-claim ang ilang nadaugan nga kuwarta.
Nanawagan sab ang SEC sa publiko nga dili mag-reply ug motawag sa mga scammers inay nga i-report gilayon kini ngadto sa SEC, BSP, o sa bisan asa man nga hingtungdan nga ahensiya.
Nanganti ang SEC nga ang malambigit sa susama nga pagpangilad ang mag-atubang ug kasong kalapasan sa Revised Penal Code, the Cyber Crime Law and Data Privacy Act.
