DAVAO CITY – Niabot sa 19 pa ka mga patay’ng lawas ang narecover sa ika-limang adlaw sa search and retrieval operations sa Masara landslide kagahapon.
Sa kinatibuk-an, mokabat na sa 68 ang ihap sa narekober nga patay nga lawas sa nagpadayon nga search and retrieval operation sa Zone 1, Brgy. Masara, Maco Davao De Oro kini subay sa datos nga gipaguwa sa MDRRMO Maco.
Samtang 32 ka mga indibidwal ang injured ug ang na rescue karong panahuna ug ang na-missing nga una ng gireport nga adunay 51 nga padayon pang gipangita sa mga rescuers.
Sa kasamtangan, padayon ang pag validate sa Management of the Dead and the Missing (MDM) Cluster sa tally sa mga missing individuals and unidentified bodies.
Sa pikas bahin, miabot na sa 1,559 ka mga pamilya ang nahikling sa mga otoridad ngadto sa walo ka mga evacuation centers.
Nagpadayon sab sa pagdawat ang gitaganang Masara Response Restore Cluster Center alang sa mga apektadong residente.
Gikatakdang magbalhin ngadto sa search and retrieval operation ang gipahigayong search, rescue and retrieval operations human sa lapas 48 ka oras nga pagkubkob sa mga biktima sa ground zero.
Sumala pa ni Engr. Ariel Canoy, head sa Incident Command Post, ginahulat na lamang ang rekomendasyon gikan sa lokal nga panggamhanan sa Davao de Oro.
Sa pikas bahin, kasamtangang ginalihok karon sa mga hingtungdang ahensya ang pagbalhin sa dul-an mil sais syentos ka mga pamilya nga nagpundo karon sa mga tulunghaan nga gihimo karong evacuation centers.
Sumala pa ni Engr. Ferdinand Dobli, ang Inicident Commander nga limitado lamang sa 50 ka adlaw ang pagpuyo sa mga evacuees nga subay sa mando sa Department of Education busa nangita na og posibleng evacuation sites ang mga hingtungdan aron mapabilin gihapon ang learning continuity sa mga estudyante nga apektado sa landslide.
