Mopatuman og gikatakdang pagputol sa kuryente ang Davao Light and Power Company karong Martes, Enero 27, 2026, nga makaapekto sa pipila ka lugar sa Maa, Bangkal, Calinan, ug Tugbok isip kabahin sa line maintenance aron masiguro ang lig-on ug luwas nga suplay sa kuryente sa siyudad.
Sumala sa power utility, sugod alas-8:00 sa buntag hangtod alas-4:00 sa hapon ang pagkawala sa kuryente sa Datu Loho Street ug Diho 4 sa Maa, lakip ang Central Park ug NHA Bangkal. Gihulagway kini nga importante nga buluhaton aron ma-check ug maayo ang mga linya ug pasilidad sa kuryente sa maong mga lugar.
Apektado usab ang Barangay Manambulan sa Tugbok District, diin planong putlon ang kuryente gikan alas-8:00 sa buntag hangtod alas-2:00 sa hapon. Sa Calinan District, molungtad hangtod alas-5:00 sa hapon ang brownout sa pipila ka bahin sa Barangay Wangan, nga gilauman nga maapektuhan ang mga panimalay ug establisyemento sa lugar.
Gipasabot sa Davao Light nga ang gikatakdang maintenance maoy kabahin sa ilang preventive measures aron malikayan ang kalit nga power interruption ug mas dako nga problema sa umaabot. Giingnan usab ang mga konsumidor nga mag-andam, ilabi na ang mga negosyante ug mga panimalay nga nagsalig sa kuryente sa ilang adlaw-adlaw nga buluhaton.
Nanawagan ang kompanya sa pagsabot ug kooperasyon sa publiko samtang ginahimo ang maong aktibidad, ug gisaad nga ibalik dayon ang suplay sa kuryente human makompleto ang maintenance, kon walay laing teknikal nga babag.
