DAVAI CITY – Pasakahan ug patong patong nga mga kaso sa NBI XI ang usa ka lalaki nga nalambigit sa Night Market Investment scam diin lakip sa mga gipangbiktima niini mga miembro ug opisyal sa PNP.
Gipresenta sa NBI XI kagahapon sa buntag, Mayo 9, ngadto sa mga tigbalita ang suspect nga si Jovanni Uy Faustino, kinsa nadakpan atol sa gipahigayong entrapment operation.
Sumala ni NBI XI Agent Elias Leaño, mokabat sa halos 20 million pesos ang nakuha nga kuwarta sa suspect gikan sa 20 ka mga nabiktima niini diin sagad sumala pa niini iyang mga kaubanang miembro sa Fraternal Order of Eagles / Philippine Eagle ug lain pang 6 sumala pa ka mga police dinhi sa dakbayan sa Dabaw.
Dugang pa ni NBI Agent Leaño nga modus operandi ni Faustino nga mang-dani ug mga investor sa iyang negosyo sa night market nga nahimutang sa Buhangin, Matina ug uban pang dapit sa Davao City.
Daghan sumala pa ang madani gumikan sa saad niini nga motubo ug dako ang gi invest nga kwarta ug mabalik kini human ang usa hangtud duha ka bulan.
Sa gihimong imbestigasyon sa NBI XI nagsugod ang kalihukan ni Faustino niadtong milabay nga tuig 2022 ug kadaghanan sa mga biktima niini nakahatag kaniya ug 200 hangtud 500,000 pesos matag usa.
Sa sinugdanan, nakadawat pa ug interest sa ilang gi-invest nga kuwarta ang mga biktima apan pagkasunod nga mga bulan mokalit na lamang kini ug kawala ug dili na makaplagan.
Nagtuo sumala pa ang NBI nga naa pay laing mga tawo nga kakunsabo ang suspect subay na usab sa mga ebidensiya nga nakuha nila gikan sa balay ug opisina niini sa Deca Homes sa Tacunan ning syudad.
Nakuha sa NBI XI gikan sa posisyon sa suspect ang 1 milllion pesos nga marked money ug mga dokumento sa mga tawo nga iyang gipangbiktima.
Labot niini, mga kasong Large Scale Estafa ug Syndicated Estafa ang ilang ipasaka batok sa suspet nga walay girekomenda nga piyansa.
