DAVAO CITY – Dakpan ang usa ka black Canadian national human ang gipahigayon nga entrapment operation sa NBI, Anti-Scam ug laing pang ahensya sa kagamhanan pasado alas 5 kaganihang hapon, sa Dona Vicenta Vill. atubangan sa Victoria plaza.
Ang dinakpan nagpaila nga usa ka William Smith, anaa sa 45-50 ang pangidaron.
Sa Ekslusibong paghinabi sa Bombo Radyo Davao kang Retired PI Venerando Jabello sa Anti Scam Unit, nga modus sa suspek ang mamiktima pinaagi sa facebook ug iyaha kining pakigkitaan personal ug muhanyag ug negosyo nga magbuhat ug peke nga kwarta. “Pananglitan kung muhatag ka niya ug P20,000, ang ibalik niya sa imuha, mahimo na nga P120,000 kay mobuhat siya ug peke nga salapi. Apan,sa iyahang paghatag sa maong kantidad, dili niya kini paabrihan sa imuhang atubangan ug didto na sa balay. Ug didto nasuta sa usa ka nabiktima nga ang iyahang gihatag diay nga kwarta puro mga papel ug usa lamang ka P500 ang anaa sa ibabaw”
Nasayran nga ubay-ubay na ang nagpatala sa ASU tungod sa maong transaksyon.
Sa karon, ang dinakpan ang anaa na sa kostudiya sa NBI 11, samtang gipailawoman pa sab gihimong imbistigasyon.
