DAVAO CITY – Gisuportahan ni Davao City Overland Transport Terminal (DCOTT) Manager Aiza Yusop ang laraw ni Councilor Conde Baluran, Chairman sa Committee On Transportation sa City Council ang pagpahimutang ug Satellite Bus Terminal sa dakbayan alang sa mga bus nga biyahe padulong sa amihanan ug habagatan.
Nagtumong kini nga mahatagan ug kasulbaran ang pagguot sa dagan sa trapiko, labi na sa sentro sa dakbayan gumikan daghanan nga mga nagabiyahe nga mga bus.
Sa panlantaw ni Yusop kung mapatuman ang nahisgutan nga plano daku kini nga tabang sa Davao City Overland Transport terminal, labi na nga nagdasok na kaayo ang mga bus sa dakbayan.
Nasayran nga bisan sa mga regular nga mga adlaw mokabat na ngadto sa saisentos hangtud sa mil dosientos ang mga nagabiyahe nga mga bus sa DCOTT hinungdan nga nagkulang na ang mga bay sa bus.
Dugang pa ni Yosop nga naglisod na sa pag-cater ang DCOTT sa mga bus gumikan kay nagkadaghan na ang mga unit sa mga bus company gumikan sa nagkataas nga populasyon sa dakbayan.
Aminado sab ang mga opesyal sa DCOTT nga nakapasabot sa traffic sa Ecoland Drive, sa Maya St., ug Candelaria St., ang mga bus nga nagasulod ug gawas sa terminal.
Samtang nagkulang ug mga personahe si Yosop ug dunay mga contractual ug Job Order nga gi-destino sa DCOTT aron nga mo-abag sa mga peronahe.
Gumikan niini kung mapatuman man ang plano nga pagpahimutang ug mga satellite terminal angayan sumala pa nga mopahimutang ug dugang personahe alang sa management, security ug mga transport officers.
