DAVAO CITY – Patay na nga nakaplagan kagahapon sa hapon ang usa ka sais anyos nga batang babaye sa bakanteng luna sa Lanang ning dakbayan sa Davao.
Naila ang biktima nga si Leah Bea Lucero, residente sa Del Pilar Extension Barangay R. Castillo Agdao ning siyudad. Matud pa sa paryente sa biktima nga si Gerlyn, gisugo sa iyaan ang bata kaniadtong adlaw nga dominggo sa hapon apan wala na kini naka-uli hinungdan nga mibati na sila ug kabalaka.
Gikanayong anaa sa kaulohan ang inahan sa biktima gumikan kay naminyo na kini ug lain samtang patay na sab ang amahan sa bata. Gibilin lamang sumala pa kini sa iyaan ug apohan kauban ang iyang mga igsuon.
Gikanayong kaniadtong adlaw nga dominggo nag-inom sumala pa ang uyuan sa biktima diin ang usa sumala pa sa mga ka-inom niini ang adunay lain nga tinan-awan sa bata hinungdan nga nagduda si Gerlyn nga aduna kini kalabutan sa krimen bisan tuod nga gilimud kini sa maong lalaki dihang giibestigahan kini sa otoridad.
Nagtuo sab ang nahisgutan nga gilugos ang biktima ug gibunalan ug gahi nga butang gumikan kay halos dili na matud pa nila kini mailhan gumikan sa grabeng bun-og sa ulo. Sa kasamtangan padayon pa ang gilusad nga imbestigasyon sa kapulisan.
