Gilayon nga girespondehan ug mihimo og lockdown ang mga bomb specialist ug K9 units ang mihimo og lockdown sa usa ka pribadong institusyon ug usa ka pampublikong tunghaan human sa sunod-sunod nga hulga sa social media nga misangpot sa mass evacuation sa F. Torres Street ug sa Mintal, Tugbok District, ning dakbayan sa Davao kagahapong adlawa.
Giila sa Davao City Police Office (DCPO) ang insidente isip usa ka “Code 8” threat nga nagsugod pagkahuman og usa ka alarma nga nasayran nahitabo sa alas 9:59 sa buntag.
Subay sa imbistigasyon sa kapulisan, usa ka 24-anyos nga magtutudlo nga lalaki ang nakadawat sumala og direct message sa Facebook gikan sa account nga ginganlan og “Garcia.”
Ang mensahe nagbutyag nga adunay posibleng bomba sulod sa tunghaan, ug gihatagan pa og detalyado nga hulagway sa usa ka suspetsadong tawo nga gihulagway nga lalaking nagsul-ob og blue nga sinina ug adunay gidala nga itom nga bag.
Human sa pagkadawat sa maong impormasyon, gilayon niining gipatuman uban sa mga magtutudlo ang mga emergency protocol. Nagpahigayon gilayon og pagsuspenso sa klase ug gipagawas ang tanang estudyante padulong sa usa ka luwas nga lugar aron makalikay sa peligro.
Paspas usab nga narespondehan sa Central 911 command center alas 10:00 pasado sa buntag nug gipatuman ang coordinated security lockdown. Gipahigayon usab sa San Pedro Police Station ang initial ocular inspection ug imbistigasyon nga gilangkuban sa SWAT ug CECU Blaster Alpha Team EOD sa DCPO.
Nahuman ang pag-inspeksyon pasado alas 11:00 kagahapon sa buntag, ug gideklara nga walay hulga ang tibuok eskwelahan sa Davao Wisdom Academy.
Apan pipila ka oras lamang ang nakalabay nahitabo na usab ang ikaduhang bomb threat sa Mintal Comprehensive National Standalone Senior High School pasado ala Una kagahpon sa hapon, pagkahuman nga ang opisyal nga social media account sa tunghaan nakadawat og usa ka hulga nga mensahe.
Sumala sa police report, ang mensahe nadawat sa alas 12:45 sa hapon, gikan sa usa ka Facebook user nga ginganlan og “Kozo Wagner.”
Giangkon sa sender nga adunay bomba nga gibutang sulod sa tunghaan ug kini “mobuto nga walay pasidaan.”
Gipatuman gilayon ang established emergency protocols.
Gipagawas ang tanang magtutudlo ug estudyante padulong sa Regional Training Center XI, nga duol lamang sa tunghaan.
Gilayon usab nga gisusi ang maong tunghaan ug nasuta nga walay nakita nga unsa man nga eksplosibo.
Sa pagkakaron, nagpadayon pa ang gihimong imbestigasyon sa mga otoridad aron masuta kung kinsa ang responsable sa maong mga sunod-sunod nga bomb threat.
