Nagpatuman ang Philippine authorities sa Taiwan ug safety measures aron seguruhon ang kaluwasan sa mga overseas Filipino workers (OFWs) gumikan ni bagyong Carina nga adunay international name nga Gaemi.
Gipahayag sa Manila Economic and Cultural Office (MECO), wala silay nadawat nga report sa Filipino casualty hangtod migawas ang weather disturbance sa Taiwan niadtong adlawng huwebes.
Nasayran nga kadaghanan sa mga kompanya sa Taiwan ang misunod sa deklarasyon sa gobyerno nga kanselahon ang mga trabaho. Samtang gipahayag usab ni Secretary Hans Leo Vacdac, ang Department of Migrant Workers (DMW) lakip na ang MECO ang mupatuman ug mga lakang aron makahatag dayon ug hinabang sa mga OFW sa Taiwan nga naapektuhan sa nahisgutang bagyo.
Gibantayan sa DMW ang kahimtang sa 4,280 ka mga OFWs sa northern Taiwan partikular na sa Yilan county, Keelung City ug Hualien. Samtang gibantayan usab niini ang 1,818 ka mga filipino agricultural farm workers sa Nantou sa Central Taiwan.
Gitambagan usab ang mga Taiwan OFWs nga magpabilin sa ilahang pinuy-anan o dormitoryo hangtod sa mosunod nga abiso gikan sa mga awtoridad sa Taiwan.
Ang mga OFW ug ang ilahang pamilya sa Taiwan ang mamahimong mutawag sa mga mosunod nga numero aron i-report ang ilahang mga kondisyon, mangayo ug panabang o muhatag ug inpormasyon sa ubang OFW nga mamahimong manginahanglan ug hinabang.
