DAVAO CITY – Gipasalamatan ni Special Assistant to the President Christopher ‘Bong’ Go ang endorsement kaniya nga mudagan sa pagka-Senador sa nasud ug sumala pa niya nga ang mga Duterte ang nahimo niya nga panig-ingnan kung unsa ang tinuod nga public servant.
Bisan pa niini gibarugan niya nga wala pa sa huna-huna niini nga modagan sa pagkasenador gumikan kay prayoridad pa niya sa pagkakaron, ang pag-alagad kang Pangulong Rodrigo Duterte ug sa tibuok nasod.
Una nang gitataw ni Go nga nagsugod lamang sa komedya ni Pangulong Rodrigo Duterte ang panawagan nga padaganon kini sa pwesto, hinungdan nga mag-agad lamang kini sa mamahimong hukom kaniya sa pangulo.
Kahinumduman nga gi-endorso ni Davao City Mayor Inday Sara Duterte Carpio si Bong Go alang sa pag-awhag kaniya nga mokandidato isip Senador sa nasud sa sunod tuig.
Sumala kang Mayor Inday garbo sa mga taga-dakbayan sa Davao si Go ug sakto na kini sa kasinati-an sa pulitika gumikan kay sukad pa niadtong dekada 90 naka-uban na niini si Pangulong Rodrigo Duterte.
Gitataw sa mayor nga napamatud-an na sab ni Go ang kasensiro sa pagserbisyo niini sa katawhan.
