DAVAO CITY – Gibarugan sa lokal nga kagamhanan nga dili pa gihapon itugot sa dakbayan ang pagpahigayon ug mga gambling activities, kalakip na ang face-to-face “sabong”, bisan nga gipailalom na karun ang siyudad sa Alert Level 1 status.
Sumala pa kang Dr. Michelle Schlosser, tigpamaba sa Davao City Covid-19 Task Force, magpadayon ang siyudad sa paglusad ug risk assessment bisan nga anaa na sa Alert Level 1 sanglit adunay mga punto sa guidelines sa Inter-Agency Task Force (IATF) ilalom sa Alert Level 1 ang nagpabilin nga concern sa dakbayan ug sa Covid-19 Task Force sama sa gambling activities.
Kini base sa amended guidelines sa Inter-Agency Task Force for the Management of Emerging Infectious Diseases (IATF-MEID) nga pinakaluag na ang Alert Level 1 o “new normal”.
Gikanayon ni Schlosser nga ang mga sakop sa Davao City Covid-19 Task Force, security, ug response clusters sa lokal nga kagamhan an ang magpahigayon ug mga panagpulong kung tugutan o dili ang pagpadayon sa face-to-face cockfighting dinhi sa dakbayan.
Gikatakda sab nga ipagula ang executive order (EO) sa lokal nga kagamhanan ug ayha pa masayran kung sagupon sa dakbayan ang IATF guidelines on Alert Level 1 o modify kini.
Subli nga nagpahinumdom ang nahisgutan nga bisan ug gipailalom na ang dakbayan sa Alert Level 1, kinahanglan nga mutamod pa gihapon sa minimum public health standards (MPHS) arun nga ma-protektahan ang kaugalingon batok sa Covid-19 transmission.
