Posibleng pabalikon sa Pilipinas ug kasuhan ang Russian vlogger nga si Vitaly Zdorovetskiy kung mapamatud-an nga nanuhol kini og mga empleyado sa Bureau of Immigration (BI) samtang siya nabilanggo sa nasod.
Sumala sa ahensya, ang kauban ni Vitaly nga si Malik Dejoun Okojie mao sumala pa ang nagpasulod og cellphone nga gigamit sa vlogger sa pagkuha og mga video.
Padayon pa karon ang imbestigasyon sa maong insidente. Ang Bureau of Immigration (BI) midugang og mga opisyal ug personahe nga gitanggal sa ilahang mga pwesto human sa pagbulabog sa gipapahawa nga Russian vlogger mahitungod sa korapsyon samtang siya gidetine sa detention facility sa Taguig City.
Sumala kang Palace Press Officer Atty. Claire Castro, lakip sa mga gitangtang mao ang duha ka deputy, samtang gidawat usab ang courtesy resignation sa warden.
Sa kinatibuk-an, unom ka mga personahe na ang gitanggal sa ilahang mga pwesto tungod sa mga gihimong pagbulgar ni Vitaly Zdorovetskiy nga kuno adunay kwarta aron mabuhat ang bisan unsang gusto sulod sa detention facility bisan paman nga kini ang gidili.
Gikanayon usab ni Castro nga ang paggamit og cellphone sa mga detenado samtang anaa sa detention gitugotan lamang aron makigkontak sa ilahang mga pamilya ug dili alang sa paghimo og mga video.
Ang mga aksyon ni Zdorovetskiy wala gitugutan, mao nga ang unang mga empleyado nga gitangtang mao ang mga personahe, ug karon lakip na usab ang warden ug ang iyahang duha ka deputy nga wala na sa ilahang mga pwesto.
